សន្សំ​មុន ឬ​សង​បំណុល​មុន?

​ការ​ដោះស្រាយ​បំណុល​ ​និង​សន្សំប្រាក់​សុទ្ធសឹងតែ​សំខាន់​ ​ប៉ុន្តែ​វាក​៏​អាស្រ័យ​ទៅតាម​ស្ថានភាព​ហិរញ្ញវត្ថុ​ផ្ទាល់​របស់​មនុស្សម្នាក់​ៗ​ ​ជាពិសេស​នៅ​ពេល​ពួកគាត់​ចង់​សន្សំប្រាក់​គ្រា​មានអាសន្ន​ ​ប្រាក់​ចូលនិវត្តន៍​ ​ឬ​សន្សំប្រាក់​សម្រាប់​គោលដៅ​វិនិយោគ​ណាមួយ​ ​ស្រប​ពេល​ដែល​គាត់​កំពុង​មាន​បំណុល​នោះ​ ​តើ​គាត់​គួរ​ជ្រើសរើស​យក​មួយ​ណា​មុន​?

​☛ ​អញ្ចឹង​! ​យើង​ទៅ​ដឹង​ទាំងអស់គ្នា​ ​ថា​តើ​គួរ​សង​មុន​ ​ចាំ​សន្សំ​តាម​ក្រោយ​ ​ឬ​សងបំណុល​តាម​ក្រោយ​ ​តែ​ត្រូវ​សន្សំ​មុន​សិន​?​

សន្សំមុន សងបំណុលតាមក្រោយ

​វា​អាស្រ័យ​ទៅលើ​ប្រាក់ចំណូល​ ​អត្រា​ការប្រាក់​ ​និង​ប្រភេទ​ក​ម្ចី​ដែល​អ្នក​កំពុង​មាន​។​ ​ឧទាហរណ៍​ថា​ ​អ្នកមាន​ចំណូល​ជាមធ្យម​ $300 ​ក្នុង​មួយ​ខែ​ ​ដោយ​បន្ទាប់ពី​ទូទាត់​ថ្លៃ​ចំណាយ​ចាំបាច់​ទូទៅ​ ​អ្នក​នៅសល់​ $200​។​ ​ស្រប​ពេល​នោះ​ដែរ​ ​អ្នក​កំពុង​មាន​ក​ម្ចី​ធនាគារ​ប្រភេទ​ឥណទាន​បុគ្គល​ (​Personal Loan​) ​ចំនួន​ $1,000 ​ដែល​មាន​អត្រា​ការប្រាក់​ 10%​ក្នុង​មួយ​ឆ្នាំ​។​ ​អ្នក​តម្រូវ​ឱ្យ​សង​ត្រឡប់ជា​រៀងរាល់​ខែ​ជាមធ្យម​ចំនួន​ $91​។​ ​ប៉ុន្តែ​អ្នក​ចង់​សន្សំប្រាក់​សម្រាប់​គ្រា​មានអាសន្ន​សិន​ ​ដូចនេះ​អ្នក​បាន​ដាក់​ស្នើសុំ​ ​និង​ទទួល​បានការ​អនុ​ញ្ញាតិ​ពី​ខាង​ធនាគារ​ ​ដោយ​បង់​តែ​ការ​ប្រាក់សុទ្ធ​ទៅ​ធនាគារ​ដែល​ជា​ធ​ម្យ​ម​ចំនួន​ $10​ក្នុង​មួយ​ខែ​។​

​ដូចនេះ​អ្នក​សល់​ $190 ​សម្រាប់​សន្សំប្រាក់​គ្រា​មានអាសន្ន​ ​ឬ​គោលដៅ​ហិរញ្ញវត្ថុ​ណាមួយ​ ​ដោយ​មួយ​ឆ្នាំក្រោយ​មក​ ​អ្នក​អាច​នឹង​នៅសល់​ប្រាក់​ $190 x 12​ខែ​ = $2,280 ​ដែល​ចំនួន​ទឹកប្រាក់​នេះ​ ​គឺ​សម្រាប់​ប្រាក់​គ្រា​មានអាសន្ន​ ​ឬ​យកទៅ​វិនិយោគ​នោះ​ឯង​។​

​យើង​ឃើញ​ថា​ ​បើ​អ្នក​សន្សំ​មុន​សងបំណុល​ ​អ្នក​បាន​ខាត​ការប្រាក់​ទៅ​ធនាគារ​ចំនួន​ $8.33 x 12​ខែ​= 100$ ​ឬ​ ​ចំនួន​ $200 ​បើ​សរុប​ទាំង​ឆ្នាំ​បន្ទាប់​នៅ​ពេល​អ្នក​ចាប់ផ្ដើម​សង​ទាំង​ដើម​ ​និង​ការប្រាក់​ទៅ​ធនាគារ​វិញ​។​ ​អត្រា​ការប្រាក់​បែប​នេះ​ ​អាច​ឱ្យ​អ្នក​សន្សំ​មុន​សងបំណុល​បានហើយ​។​

​បញ្ជាក់​៖​ ​ចំនួន​ទឹកប្រាក់​ $190 ​នេះ​ ​គ្រាន់តែ​ជាឧទាហរណ៍​តួ​រលេ​ខ​ដែល​អ្នក​គិត​ចង់​សន្សំ​តែប៉ុណ្ណោះ​។

សងបំណុលមុន សឹមសន្សំតាមក្រោយ

​សន្មត​់​ថា​អ្នក​កំពុង​មាន​ក​ម្ចី​ពី​អ្នក​ចង់​ការប្រាក់​ ​ជាមួយ​អត្រា​ការប្រាក់​ 10% ​ក្នុង​មួយ​ខែ​។​ ​ប្រសិនបើ​យើង​ទុក​ចោលបំណុល​មួយ​នេះ​ ​រួច​បង់​តែ​ការប្រាក់​ ​អ្នក​នឹង​ឃើញ​ថា​ក្នុងរយៈពេល​ 1​ឆ្នាំក្រោយ​ ​អ្នក​នឹង​ខាតបង់​ការប្រាក់​អស់​ $1,200 ​ជាមួយ​ប្រាក់ដើម​គឺ​នៅ​ដដែល​។​ ​ដូចនេះ​ ​អ្នក​គួរ​ចាំបាច់​សងបំណុល​នេះ​ ឱ្យ​កាន់តែ​លឿន​ ​កាន់តែ​ល្អ​ ​ដ្បិត​ថាបើ​អ្នក​ទុក​កាន់តែ​យូរ​ ​អ្នក​កាន់តែ​មាន​ហា​និ​ភ័យ​ខាតបង់​កាន់តែ​ខ្ពស់​ផង​ដែរ​។​

​យ៉ាងណាមិញ​ ​បើ​ទោះបីជា​អ្នក​កំពុង​មាន​បំណុល​ជាមួយ​អត្រា​ការប្រាក់​ខ្ពស់​ក្ដី​ ​អ្នក​គួរ​ចាំបាច់​មាន​ប្រាក់សន្សំ​គ្រា​មានអាសន្ន​បន្តិចបន្តួច​ដែរ​ ​ដ្បិត​ថា​ ​អ្នក​អាច​នឹង​ត្រូវ​ការប្រាក់​មួយ​ចំនួន​ដូចជា​ថ្លៃ​សុខភាព​ ​ថ្លៃ​ជួសជុល​យានយន្ត​ ​ថ្លៃ​ចំណាយ​ផ្សេងៗ​ ​ដែល​ក្រៅពី​ចំណាយ​ចាំបាច់​ ​ចៀសវាង​មាន​ភាព​លំបាក​នៅ​ពេល​មាន​គ្រាអាសន្ន​៕