អ្នកទាំងអស់គ្នាដែលលឺអត់ថា អ្នកខ្លះសូម្បីតែគេងលក់សោះក៏លុយហូរចូលដែរ?
ថ្ងៃនេះកាក់សេននឹងណែនាំអ្នកទាំងអស់គ្នាឲ្យស្គាល់ប្រភពចំណូលទាំង៥ ដែលអ្នកអាចរកកម្រៃបន្ថែមបានក្នុងរយ:ពេលវែង និងអាចចាត់ទុកជាចំណូលអកម្មបាន។
ផ្តល់កម្ចីយកការប្រាក់
បើសិនជាអ្នកមានលុយខ្លះនៅសល់ អ្នកអាចគិតគូរពីការផ្តល់កម្ចីយកការប្រាក់ ដល់អ្នកជុំវិញខ្លួន ឬ អាជីវកម្មតូចផ្សេងៗបាន។
វាអាចមានហានិភ័យទាប បើសិនអ្នកឲ្យមនុស្សពីរ ឬបីអ្នកខ្ចីម្តងបន្តិចៗ ជៀសជាងឲ្យមនុស្សតែម្នាក់ខ្ចីម្តងរាប់រយរាប់ពាន់ជាដើម ដូច្នេះហើយទោះបីមានរឿងអ្វីក៏ដោយ អ្នកមិនសូវខាតបង់ធ្ងន់ធ្ងរនោះទេ។
បញ្ជាក់៖ រាល់ការផ្ដល់កម្ចី ក្នុងនាមជាម្ចាស់បំណុលត្រូវមានលិខិតកិច្ចសន្យាច្បាស់លាស់។
ជួលចលនទ្រព្យ ឬអចលនទ្រព្យ
ពេលនៅក្មេងមានដែលឆ្ងល់ថា ហេតុអ្វីចាស់ៗចូលចិត្តទិញដីទិញផ្ទះទុកដែរទេ? នោះគឺដោយសារ វិធីរកចំណូលមួយនេះមានភាពពេញនិយមណាស់ ហើយទីផ្សារក៏មានការរីកចម្រើនទៀត។
ការជួលចលនទ្រព្យ ឬអចលនទ្រព្យ ដូចជា ការជួលផ្ទះ ដី បន្ទប់ ហាង ឡាន ម៉ូតូ ឬកង់ដូចនៅតាមកន្លែងទេសចរណ៍ផ្សេងៗ អាចឲ្យអ្នកចំណេញប្រាក់ពីថ្លៃជួលទាំងដែលអ្នកមិនចាំបាច់ត្រូវចំណាយពេលវេលាច្រើន។ ក៏ប៉ុន្តែអ្នកក៏ត្រូវចំណាយពេលវេលាខ្លះ ដើម្បីថែរក្សាទ្រព្យទាំងនោះដូចជា ការលាងសម្អាត ជួសជុល ឬទៅបង់ពន្ធ ជាដើម។
ផលិតវីដេអូ និងសរសេរមាតិកា
សម័យអុីនធឺណែតបានបង្កើតជាប្រភពចំណូល និងការងារច្រើនណាស់សម្រាប់មនុស្សគ្រប់វ័យ។ ឥឡូវនេះ អ្នកអាចរកចំណូលបានតាមរយ:ការផលិតវីដេអូ និងសរសេរមាតិកាអំពី ប្រធានបទពេញនិយមផ្សេងៗ។
ទោះបីជាយ៉ាងណាក៏ដោយ អ្នកក៏ត្រូវចំណាយពេលវេលា និងកម្លាំងច្រើនពេលដំបូងដើម្បីផលិតស្នាដៃ និងបង្កើនប្រជាប្រិយភាពសម្រាប់ថ្ងៃអនាគតផងដែរ។ ហើយស្នាដៃ និងមាតិកាដែលបង្កើតហើយនោះ គឺនឹងត្រូវមានវត្តមានលើបណ្តាញសង្គម ឬ គេហទំព័រជារៀងរហូតដែលអាចជាឱកាសរកចំណូលឲ្យអ្នកបាន ទាំងពេលគេង យល់សុបិន្ត។
និពន្ធសៀវភៅលក់
បើសិនជាអ្នកមានទេពកោសល្យសរសេរ ឬមានរឿងផ្សេងៗផ្ទាល់ខ្លួនដែលអ្នកចង់បញ្ចេញទៅក្រៅ អ្នកអាចពិចារណាពីការសរសេរជាសៀវភៅក្រដាស ឬអនឡាញផងដែរ។
អ្នកប្រាកដជាត្រូវចំណាយពេលវេលា និងកម្លាំងច្រើនក្នុងការសរសេរ និងផ្សព្វផ្សាយ ក៏ប៉ុន្តែបន្ទាប់ពីនេះ អ្នកមិនសូវចាំបាច់ធ្វើអ្វីច្រើនទេ គឺចាំតែមានគេទិញ ឬអានសៀវភៅរបស់អ្នក ហើយចំណូលហូរចូលតាមពេលវេលានោះឯង ដូចជាអ្នកនិពន្ធល្បីៗមួយចំនួនដែលទោះបីជាគាត់លាចាកលោកទៅក៏នៅតែរកចំណូលបានឲ្យគ្រួសារបន្តជំនាន់ផងដែរ។
លក់ស្នាដៃ (រូបភាព ឬគំនូរ)
តាំងពីរូបភាពដែលគេហៅថា (Stock Image) គំនូរ ឬស្នាដៃឌីជីថលផ្សេងៗ សុទ្ធតែអាចដាក់លក់ដើម្បីទទួលបានចំណូលជាប្រចាំផងដែរ។
មានក្រុមហ៊ុន និងមនុស្សច្រើនណាស់ដែលត្រូវការផលិតផលបែបនេះដើម្បីបំពេញតម្រូវការការងាររបស់ពួកគេ ហើយក៏មានកន្លែង ឬគេហទំព័រជាច្រើនសម្រាប់ឲ្យយើងបង្ហាញ និងលក់ស្នាដៃផងដែរ។ នេះគឺជាវិធីរកចំណូលដ៏ល្អសម្រាប់អ្នកចង់បានចំណូលក្រៅបន្ថែមពីជំនាញ និងទេពកោសល្យរបស់ខ្លួនដែលមិនចាំបាច់ធ្វើការគ្រប់ពេល ក៏ទទួលបានកម្រៃ។
បញ្ជាក់៖ សូមអនុវត្តវិធីទាំងអស់នេះដោយទំនួលខុសត្រូវ ទាំងផ្លូវសីលធម៌ ផ្លូវច្បាប់ និងស្ថិតក្នុងហានិភ័យដែលអ្នកអាចគ្រប់គ្រងបាន។
© 2023 - 2024 KAKCENT | រក្សាសិទ្ធិដោយកាក់សេន
សូមទាក់ទងមកពួកយើង ប្រសិនបើអ្នកចង់យកមាតិកាយើងទៅប្រើប្រាស់បន្ត។
