បន្ទាប់ពីបានយល់ដឹងយ៉ាងច្រើនអំពីផ្សារភាគហ៊ុនកម្ពុជា ផលចំណេញ ព្រមទាំងហានិភ័យដែលអាចជួបប្រទះ អ្នកទាំងអស់ប្រាកដជាចង់ដឹងថា តើត្រូវធ្វើយ៉ាងដូចម្តេចក្នុងការទិញភាគហ៊ុនដែលយើងចង់បាន។ តោះ! យើងទៅដឹងទាំងអស់គ្នា៖
១. ទាក់ទងឈ្មួញកណ្ដាល
ជាដំបូងអ្នកត្រូវស្វែងរកក្រុមហ៊ុនមូលបត្រដែលអ្នកចូលចិត្តដើម្បីជួយបង្កើតគណនីជួញដូរ ព្រមទាំងជួយសម្រួលទិញលក់ភាគហ៊ុនជំនួសអ្នក។ យ៉ាងណាមិញ ក្នុងប្រទេសកម្ពុជាយើង អ្នកអាចស្វែងរកដៃគូសហការ(ឈ្មួញកណ្ដាល)ជាមួយផ្សារមូលបត្រកម្ពុជាបានតាមរយៈតំណរនេះ៖ ផ្សារមូលបត្រលកម្ពុជា
ការបើកគណនីជួញដូរត្រូវបង់ប្រាក់ចំនួន ២ម៉ឺនរៀល និង ប្រើរយ:ពេល២-៣ថ្ងៃ ទើបទទួលបានលេខសម្គាល់របស់វិនិយោគិនផ្ទាល់ខ្លួន។ បន្ទាប់មក អ្នកអាចយកព័ត៌មានដែលបានមកពីឈ្មួញកណ្ដាលទៅបំពេញចូលក្នុង គេហទំព័រ២គឺ i.csx.com.kh សម្រាប់មើលស្ថានភាពភាពហ៊ុន និងមួយទៀតគឺ mts.csx.com.kh សម្រាប់ជួញដូរភ្លាមៗតាមរយៈទូរសព្ទ។
គន្លឹះ៖ គួររើសយកក្រុមហ៊ុនណាដែលមានថ្លៃធ្វើប្រតិបត្តិការទាប ហើយផ្តល់សេវាកម្មល្អដើម្បីឱ្យការបញ្ជាទិញលក់របស់អ្នកប្រព្រឹត្តទៅដោយរលូន និងបង្កើនផលចំណេញផងដែរ។
២. បង្កើតគណនីដាក់ប្រាក់ក្នុងធនាគារដែលជាដៃគូរបស់ក្រុមហ៊ុនឈ្មួញកណ្ដាល
បន្ទាប់ពីមានគណនីជួញដូរហើយ លោកអ្នកក៏មិនទាន់អាចជួញដូរបានភ្លាមនោះដែរ លុះត្រាណាតែអ្នកមានប្រាក់នៅក្នុងគណនីជួញដូរ ដូច្នេះ អ្នកត្រូវទៅបើកគណនីលុយខ្មែរជាមួយធនាគារដែលជាដៃគូជាមុនសិន។ បន្ទាប់មកទៀត អ្នកត្រូវធ្វើការផ្ទេរប្រាក់តាមចំនួនដែលសមស្របទៅកាន់គណនីក្រុមហ៊ុនឈ្មួញកណ្ដាលនោះ ដើម្បីឲ្យគេផ្ទេរបន្តចូលគណនីជួញដូររបស់អ្នក (ឈ្មួយកណ្ដាលនឹងផ្ដល់យោលបល់ និងប្រាប់ពីធនាគារដែលជាដៃគូសហការរបស់ពួកគេ)។
យ៉ាងណាមិញ អ្នកអាចមានជម្រើសក្នុងការមិនទៅបើកគណនី ដោយអ្នកអាចត្រូវចំណាយពេលទៅដាក់ប្រាក់នៅការិយាល័យក្រុមហ៊ុនឈ្មួញកណ្ដាលដោយផ្ទាល់ក៏បាន។ យើងលើកទឹកចិត្តអ្នកគួរបើកគណនីដាក់ប្រាក់ព្រោះថាវាផ្តល់ភាពងាយស្រួលដល់វិនិយោគិនក្នុងការដាក់ដកប្រាក់និងបញ្ជាទិញបានរហ័សទាន់ចិត្តជាង។
៣. ការបញ្ជាទិញតាម Mobile Trading System (MTS)
បន្ទាប់ពីដាក់ប្រាក់រួច អ្នកអាចពិនិត្យមើលទឹកប្រាក់ក្នុង MTS ដើម្បីធានាមានប្រាក់គ្រប់គ្រាន់ សម្រាប់ទិញភាគហ៊ុនដែលអ្នកចង់បាន។ អ្នកអាចធ្វើវាដោយខ្លួនឯង ឬទាក់ទងទៅឈ្មួញកណ្ដាល ប្រសិនបើអ្នកចង់ទទួលបានការប្រីក្សាបន្ថែម ឬក្នុងករណីអ្នកចង់ទិញក្នុងបរិមាណច្រើន។ អ្នកត្រូវដាក់បញ្ជា(place order) ជាមុនសិនព្រោះត្រូវរង់ចាំដល់មានអ្នកលក់ ត្រូវតម្លៃដែលយើងចង់បាន ទើបប្រតិបត្តិការទាំងពីរនេះមានការផ្គូរផ្គង និងបានន័យថាអ្នកទិញបានជោគជ័យ៕
